A actualidade no contexto global está atravesada por crises encadeadas, escaladas permanentes de tensión e xenocidio. Trátase de síntomas dun sistema que prioriza o privilexio duns poucos fronte aos dereitos, a dignidade e o ben común. O que está en xogo neste taboleiro é non só control o dos recursos e a soberanía do territorio, senón tamén o equilibrio ecolóxico e mesmo as condicións que fan posible a vida.

O gasto militar increméntase a un ritmo alarmantemente elevado da man da concentración de poder e un aumento dos movementos represivos e de extrema dereita. Así, os intereses económicos e xeopolíticos seguen a marcar a folla de ruta dun modelo insostíbel que vén promovido por axendas mediáticas propias. Mentres, os organismos supranacionais amosan evidentes eivas á hora de regular ou limitar este panorama e levar a cabo compromisos efectivos, e as democracias vense cada vez máis deterioradas.

Resulta pertinente plantexarse, ante esta imaxe, cal ha de ser o rol que tomen as cidadanías de cara a artellar respostas efectivas? preguntarse: como impactar sobre esta realidade? reflexionar arredor de como ampliar as marxes de actuación, de como activar, empoderar, mobilizar e mobilizarnos dende abaixo, non só como dereito, senón como tamén como deber.

A comprensión das interrelacións entre os diferentes poderes fácticos e axentes protagonistas internacionais, así como o coñecemento das posibles estratexias fronte ás ameazas e consecuencias neste contexto, son os alicerces sobre os que se edifican, tamén este ano, as xornadas “Planeta en disputa: alertas globais e respostas populares”, que queren:

• Abrir un espazo onde a cidadanía poida reflexionar sobre o seu papel como axente do cambio, na busca da xustiza e a solidariedade internacionalista real.
• Comprender en profundidade as dinámicas actuais de poder global, poñendo o foco nos conflitos activos e as súas raíces políticas e económicas.
• Explorar alternativas, estratexias e ferramentas para a construción de sociedades máis xustas.

“Planeta en disputa: alertas globais e respostas populares” son xornadas que discorrerán en Vigo, entre o 18 e o 21 de marzo de 2026. Achegaranse olladas diversas mediante a realización de distintas palestras para analizar a presente situación xeopolítica e as dinámicas de poder e contrapoder que nela operan.