Nun mundo marcado pola incerteza e a inestabilidade, as presións xeopolíticas medran a un ritmo alarmante. Guerras, xenocidios, colonizacións, conflitos larvados nun mundo multipolar en crecente tensión. Son exemplos visibles dun sistema fracturado, onde os intereses estratéxicos e económicos pisan, sen reparos, os dereitos das persoas e dos pobos.

As grandes potencias globais fan o seu xogo de poder, que vai alén das fronteiras polas que tanto velan, alimentando conflitos a través de alianzas militares, sancións económicas, campañas de desinformación e forzas de represión. Ao mesmo tempo, organismos internacionais, creados para manter a paz e o equilibrio, están paralizados pola presión dos mesmos actores que perpetúan a violencia. As consecuencias desta dinámica tradúcense en millóns de vidas truncadas, desprazamentos masivos e sociedades enteiras sumidas no medo e na pobreza.

Ante este panorama, cabe preguntarse cal é o papel da cidadanía global e das organizacións internacionais á hora de mediar, denunciar ou mesmo deter esta escalada que ameaza os dereitos humanos e o medio ambiente. A resposta non é sinxela, mais pasa pola necesidade urxente de fortalecer os lazos de solidariedade internacional, tecer redes de apoio mutuo e esixir mecanismos de mediación que prioricen a vida fronte aos intereses xeoestratéxicos.

Un ano máis, a análise das forzas de poder e contrapoder no ámbito internacional, xunto co coñecemento das resistencias locais e globais, son o fío condutor das xornadas:

“Mundo en crise: guerra xeopolítica e loitas sociais”, que procuran:

• Comprender en profundidade as dinámicas actuais de poder global, poñendo o foco nos conflitos activos e as súas raíces políticas e económicas.
• Crear un espazo de reflexión colectiva, onde a cidadanía poida recoñecer o seu papel na loita pola paz e a xustiza internacional.
• Explorar alternativas, estratexias e ferramentas para a construción de sociedades máis xustas, dende o local ao global.

“Mundo en crise: guerra xeopolítica e loitas sociais” son xornadas que discorrerán en Vigo, entre o 19 e o 22 de marzo de 2025. Achegaranse olladas diversas mediante a realización de distintas palestras para analizar a presente situación dos diferentes poderes fácticos e como combatelos.