Este mércores 18 de marzo, no auditorio do ECOAR))), celebramos dúas reflexións clave para comprender o momento actual. Ás 18:00 h, Asier Arias Domínguez abriu a xornada con “O sistema é o problema! Militarización, colonialismo e límites biofísicos”, na que se incidiu na necesidade de repensar os marcos analíticos para comprender a relación entre a espiral belicista e a degradación ecosocial. A palestra conectou a reconfiguración do sistema-mundo e os programas de rearme da Unión Europea coa necesidade de situar a xustiza social no centro do debate ambiental.
Ás 20:00 h, Augusto Zamora Rodríguez ofreceu “Yankees, Go Home! Política mundial en tempos de Trump. De Venezuela a Irán”, cunha análise da política exterior estadounidense e as súas repercusións en distintos escenarios internacionais, nun contexto de crecente inestabilidade xeopolítica.
A reflexión continuará mañá, xoves 19 de marzo con dúas novas intervencións centradas nas transformacións ideolóxicas e nas respostas comunitarias fronte ás ameazas reaccionarias. Ás 18:00 horas, Pablo Elorduy presentará “Nin un paso atrás! Silicon Valley abraza o fascismo”, onde abordaremos as conexións entre grandes corporacións tecnolóxicas e movementos de ultradereita. Posteriormente pechará a xornada, ás 20:00, Irene Zugasti con “Non nos calarán! Como nos contan as guerras? Xeopolítica e comunicación”, para reflexionar sobre a propaganda belicista e a responsabilidade do xornalismo na construción do consenso arredor dos conflitos.
Mañá continuaremos tecendo rede, compartindo análise e fortalecendo as resistencias colectivas.
Ninguén o fará por nós!